Քարոզարշավի ընթացքում արտաքին գործերի նախարարը թույլտվություն է խնդրել վարչապետից
Քարոզարշավի ընթացքում տեղի ունեցած մի դրվագ մեծ ուշադրություն է գրավել։ Արարատ Միրզոյանը, որպես արտաքին գործերի նախարար, խոսնակի էջով գրառման համար թույլտվություն է խնդրել վարչապետ Նիկոլ Փաշինյանից։
Այս իրադարձության վերաբերյալ մանրամասն վերլուծություն է ներկայացրել քաղաքական վերլուծաբան Հակոբ Բադալյանը։ Նրա կարծիքով՝ այս դրվագը «պերճախոս» վկայություն է արտաքին քաղաքականության իրականացման մակարդակի մասին։
Հակոբ Բադալյանի խոսքով՝ արտաքին գործերի նախարարը, մասնակցելով քարոզարշավին, մոտենում է վարչապետին և նրան ինչ որ բան է ասում։ «Նիկոլ Փաշինյանի վրա կա փակցրած խոսափող, և նա փորձում է ծածկել, բայց ոչ այնքան հաջող։ Լսելի է, թե ինչպես է ԱԳ նախարարն ասում ինչ որ բան կապված թուրքերի հետ։ Մասնավորապես, լսվում են՝ «թուրքերն էսօր…» բառերը։ Իհարկե, այս ամենը կարող է լինել նորմալ աշխատանքային պրակտիկա, եթե տեղի է ունենում իսկապես պետական աշխատանքային ձեւաչափով, այլ ոչ թե նման «փնթիությամբ»։ Կարելի է պատկերացնել, թե ինչ մակարդակով է իրականացվում արտաքին քաղաքականությունն ընդհանրապես»,- նշել է վերլուծաբանը։
Նա նաև հարց է տվել, թե ի՞նչ կարիք կար ԱԳ նախարարին ներգրավել քարոզարշավում։ Ըստ նրա՝ Հայաստանում անցկացված նախորդ ընտրություններին որևէ արտաքին գործերի նախարար չի թողել իր պաշտոնը և չի մասնակցել նախընտրական քարոզչությանը։
Այս դրվագը, ըստ Հակոբ Բադալյանի, ցույց է տալիս, թե որքանով է հայտնի և հասանելի դարձել արտաքին քաղաքականությունը ներկայիս պետական կառույցներում։
